議員之聲｜李靜儀冀完善勞動保障和社會保障制度 讓居民分享經濟成果 向長官提問及回覆

疫情三年，物價和油價真係貴咗；但居民月收入中位數較2019年底減少1，000元。公務員等不少僱員凍薪三年，而酒店、飲食、批發零售、運輸倉儲及通訊、不動產及工商服務業等大部分行業，收入中位數大減2，000元或以上，製造業和建築業減少1，000元，相關行業涉及超過17萬僱員。居民的購買力遠遠落後於通脹，工資水平過低，擔心“有排＂回復唔到疫前水平，理解居民好關心要提前派現金分享。

勞動保障不足問題凸顯，但當局近年較少主動檢討勞動範疇法律，包括勞動關係法、停工補償、欠薪追討機制、工傷意外賠償、打擊黑工等規範，都有待完善；政府亦未有進一步優化社會保障和央積金制度；央積金注資停止多年，是否有條件重新注資？！

國家主席習近平在兩會閉幕會議中提出，堅持人民至上，完善分配制度，健全社會保障體系，讓現代化建設成果更多更公平惠及全體人民。請問 長官閣下，特區政府未來有何計劃加強這個惠民的目標？經濟復甦和發展，但居民的實質工資收入縮水唔少，又受通脹之苦，特區政府有何方案完善分配制度，體現經濟成果分享給居民？五‧一將至，政府會否承諾啟動檢討多項勞動範疇法律？如何加強保障僱員？會否優化社會保障體系，包括提升養老金及恢復注資央積金，強化居民的保障和養老支援？

行政長官回覆

關於勞工法例修改，經財司已作有關安排。根據有關立法和修法要求，當局會做有關社會諮詢工作，並會一步步進行。 就居民收入減低，這是必然的。經過三年疫情，收入中位數必然拉低。評估今年的收入中位數會有所提升，這是會浮動的，不是固定的，一定會有上浮動。消費指數已作回應。

2022年1月養老金已調升至3740元。直至2022年12月底，按機制計算CPI只錄得0.89%，並未達到觸發啟動調整機制3%的標淮。因此2023年養老金持續每月最高3740，其它給付金額保持不變。CPI一旦觸動3%會作有關檢討。

2020年我哋已經檢討過一次嘅，所以呢個係有機制，任何事我哋都要有個法律依據同埋一個機制。呢個唔係長官嘅意志，而係有個機制去做任何事，如果係達到呢個3%，你唔需要講經財司都係會開始進行呢個機制。所以大家只能係按照統計局嗰條數字，如果佢去到3%，我哋必然一定要加嘅，因為2020年我哋已經加過一次。 非強制公積金，我諗係個個財政預算同埋個個司長回應嗰陣時，你已經講得好清楚。因為呢個都係有個法律嘅依據，呢個唔係淨係得老人家，係所有40幾萬嘅有關嘅我哋開咗公積金戶口嘅人士，都係有呢個關聯嘅。 呢個唔係淨係得老人家，所以好多老人家話，只係得我欺負我哋老人家，唔係嘅依個公積金嘅7000蚊嘅分享，係要有我哋嘅，我哋嘅有公積金戶口全部都有嘅。所以依方面嚟講，我哋可以計到嘅7000蚊一個人，我哋40幾萬人，大概就係要30幾億你話幾時可以啟動返呢個機制呢？ 如果我哋明年嘅財政預算，譬如我哋今年睇到今年嘅數，我哋到下半年我哋一定開始做明年的財政預算。明年的財政預算，我將呢個30幾億擺咗落去之後，同我哋嘅總收入平衡嘅，或者有1蚊盈餘都好，咁就已經達到呢個要求。即係你起碼要平衡先啦，係咪呀？即係平衡先啦但你唔可以話我平衡咗之後，你再畀30幾億，咁我如果冇30幾億嘅盈餘，我等於又係赤字囉。

所以我哋要將呢個30幾億我哋會做試算，即係我哋每一年下半年我哋會做，各個部門交咗預算上嚟，我哋都會做一個試算嘅。即係大家要開支幾多錢，我哋估計我哋嘅收入幾多錢，即係舊年我哋估計今年我哋嘅博彩毛收入係1300億嘅呢個數字。大家當時嚟講都好質疑我哋呢個數量，但我哋都係堅持返呢個數字，我哋認為有信心嘅。但係呢個1300億都係未可能平衡嘅咁睇今年下半年我哋嘅稅收到底去到邊一度？ 我哋呢個稅收去到某一個級別之後，咁我哋將呢個30幾億嘅7000蚊嘅注資，我哋擺咗落去我哋呢個總支出入面。因為要加上總支出入面，我哋就可以試算當我哋係收入大於我哋嘅有關嘅支出，我哋一定係將呢個7000蚊就可以入去。

所以呢個就係我哋嘅標準，所以今日同大家講清楚你話如果係將所有嘅儲存拎出嚟，咁就好簡單，真係唔使講啦，我哋仲有儲存。咁大家分晒去就冇事啦咁樣，係咪呀？即係唔可以咁做，即係我哋係一個要有負責任嘅，按照返法律做過我哋應該要做嘅工作。所以呢方面嚟講，希望大家理解，在第7/2017號嘅法律第40條係有呢個機制喺度。所以喺呢方面嚟講，我哋就，而家嘅老人家我哋係幾多呢？65歲以上嘅長者，可受惠於養老金敬老金現金分享。一共就係我收到個數字，最高可以去到68220蚊一年，咁每個月大概係5685蚊，呢個就係而家嘅。當然仲有一部分嘅長者可能係比較困難，但係我哋有機制嘅如果邊啲長者係喺而家咁嘅最低嘅保障線入面仲係有困難。可以同我哋嘅社工局呢個進行有關嘅申請，我哋係有機制去支援嘅呢個我哋好多種機制。譬如我哋嘅援助金嘅制度，我哋俾多一個月，我哋呢個本身局佢哋都有㗎啦。再另外嚟講短期嘅食物供應，同埋社會融和計劃等等，呢方面如果好有困難，我哋一定唔會視而不理，一定會係幫助嘅。所以呢方面我哋有保證機制，但係唔可以話係唔精準嘅去做，即係我哋全部一齊，一係就唔得，咁樣就唔係咁好。所以呢方面我哋有個基數，有個保障線，最低保障線，但係當我哋長者有困難，我哋一定會去支援，就係呢個我哋嘅做法好，多謝你嘅問題。